«Оң карааң сени бачытче чыгаар болза, ону ушта казып октавыт! Бүгү мага-бодуңну тамыже киир октадырының орнунга ооң бир кезээнден адырлыры сеңээ дээре (Мат 5:29)» деп Ыдыктыг Бижилгеде бижээн.
Бо сөзүглелге үндезилээш алырга, бачыт кылырының орнунга кижиниң бир караа согур, бир кулаа-даа дыңнавас болганы дээре ышкаш эвес-тир бе? Чүге ынча деп бижип кааныл деп айтырыг кижи бүрүзүн сонуургады бээр. Чер кырын ажык чок хоозун чугаа дола берген
Улустуң сөглепкени сөс бүрүзүн сүрүп, коптарба, бодуңнуң чоок улузуңну ырадып ап болур сен. Хоозун сөстерни чүрээңче эрттирбе, сагыш-сеткилиңни артык, утказы чок сөстер-биле ундаратпа. Хоозун чугаага киришпе.
Алгыш-кырыш кылган улус аразынче кирбээни дээре, оларның бачыттыг херээнге «боражы» берип болур. Бир эвес кыпкан отче саржаг каапса, чалбыышталып үнер, ийи кижи аразынга сөглээн сөс аас-дылды өөскүдер. Өрттенген бажыңның иштинче кирбейн өжүрери дег, аас-дылды оваарымчалыг чавырар.
«Дыл биле от көңгүс дөмей. Мага-бодувустуң өске кезектериниң аразында дыл дээрге, бузут башкарган делегей-дир. Дыл бүгү мага-ботту бужартадып, бүгү бүдүжүвүстү өрттендир чиптер, а ол өрт тамының одундан өөскүүр» (Иак 3:6)
Бир эвес дылдың бодал чокка эдипкени сөс бүрүзүн чүрээнче хүлээр чүве болза, кижиниң мөзү-бүдүжүн үреп алыр айыылдыг болур. А бир эвес эки, сүүзүннүг сөс болза, кижиниң мөзү-бүдүжүнүң экижииринге ажыктыг. «Дыл мага-бодувустуң хензигийне кезээ-даа болза, улуг ажыл-херектерни бүдүрүп шыдаар (Иак 3:5)» - деп, Ыдыктыг Бижилге чугаалап турар. Ынчангаш кижи чүрээнге, сагыш-сеткилинге «шүүр» салып алза чогуур. Көрген, дыңнаан чүүлүңнү шүүревейн, дамчытпа! Чүге дээрге, сээң дылың бүгү мага-бодуңну бужарттадып, бүдүжүңнү өрттендир чип болур, айыылдыг!
Хүлер Чүлдум-оол.
