Хүндүлүг редакция, силерге бистиң айтырыывыска харыыны бээри-биле бөлүк христианнар мурнундан бижидивис. Бурган Бодунуң чырыы-биле силерниң угааныңарны чырыдып, ыдыктап, шын харыыны Бодунуң күзели-биле бээрин дилеп тейлеп тур бис.
2016 чылдың январь 1-ден эгелеп электроннуг чиптиг чаа биометрлиг паспорттарны ажыглалга киирери көрдүнүп турарының дугайында Чазак солуннарында бижип турар. Электроннуг чипти улуг-биче кижи бүрүзүнүң хаваанга азы оң талакы холдарынга салыр. Ол кижилер дистанциялыг удуртулгаже кирер. Ол чип чокка чүнү-даа садып ап-даа, садып-даа шыдавас деп турар.
Церковь араатанның овурунда меге өөредигни тиилээн-не болгай, а ам бо үеде, ол арааттанның ажылынга удур шын болгаш быжыг туруштуг арттар аргазы бар бе?
Ирина Колошина бижээн, адаанда хөй кижи ат салган.
Иоаннга Бургандан Ажыдыышкын деп номнуң 13-кү эгези дег хөй цитатага ажыглаттынган, анализ хыналдага кирген база маргылдаалыг айтырыгларга онаашкан үзүндүлер Ыдыктыг Библияда ховар. Ында бижиттингени: «Мен оон черден үнүп орар араатанны көрүп кагдым. Ол хураганныы дег ийи мыйыстыг, ынчалза-даа улу ышкаш чугаалаар болду. Ол бирги араатанның өмүнээзинден оңуу ышкаш бүрүн эргени эдилеп, бүгү бо делегейни база ында чурттаан улусту өлүмнүг балыы экирий берген бирги араатанга мөгейеринче ыдалап турду. Ийиги араатан өндүр улуг кайгамчык чүүлдерни кылды: улус көрүп турда отту безин дээрден бадырып турду. Ийиги араатанга биргизиниң өмүнээзинден кайгамчык чүүлдерни кылыр арганы берген турган. Ынчангаш ол оозу-биле чер кырында чурттаан хамык улусту дуурайлап каапкан. Черниң чурттаткчыларынга хылыш-биле өлүмнүг балыглатса-даа, өлбейн барган бирги араатанның дүрзүзүн шуткуурун ийиги араатан дужаады. Ийиги араатанга биргизиниң дүрзүзүн тынгарар арганы бээрге, ол дүрзү чугаалаар база аңаа мөгейбээн хамык улусту дужаар харыктыг апарды. Ийиги араатан бүгү улусту: улуг, бичии, бай, ядыы, хостуг, кул деп ылгал чокка, оң холунга, азы хаваанга таңма бастыртып, демдектедиринге албадай берди. Ындыг демдек чок кижи чүнү-даа садып аар, азы садар эрге чок турган. А ол демдек араатанның ады азы ол атты көргүскен ат болур. Борта мерген угаан херек. Угаанныг кым-даа болза араатанның адын санап үндүрүп шыдаар, чүге дээрге ол сан кижи амытанны адынга дүгжүр 666 деп сан болур». (Ажыд. 13:11-18).
Баштай мен каш айтырыгдан салыйн: Ажыдыышкынны канчаар сайгарып билзе чугулал: сөстүң дорт утказы-биле бе азы символ демдек-биле бе? А бир эвес бир чамдыызын сөстүң дорт утказы-биле артканын символ демдек-биле сайгарар болзувусса, ооң кызыгаары кайдал? Ол кызыгаарны кым чорудуп турарыл?
Ажыдыышкында бижитинген сөстер биске йөрээл салдарлыг болуру-биле бо айтырыгны тодарадырының чугулазын көргүскен чижектерни көрээлиңер. Бис Бурган Адага, Бурганның Оглунга база Ыдыктыг Сүлдеге бүзүрээр бис. Иисус Христос Бурган эвес, Ыдыктыг Сүлдеде амы-хуу чок дээн чижектиг өске өөредиглерден Апостолдарның өөредии ылгалдыг. Ам база айтырыг: Каш Ыдыктыг Сүлде барыл? Иоанның бижээни Ажыдыышкын деп номундан алгаш көөр болзувусса … чеди сүлде бар! Ажыдыышкын 3:1-ни номчуңар.
Бурганның Сүлдези чаңгыс деп, Бурганга бүзүрээр улус, бис билир бис.
Ажыдыышкынны шын тодарадыры-биле ам база бир айтырыгдан салыптайн: Кым камгаладыг бооп болурул? Ол айтырыгга харыы хөй деп билир мен, ынчалза-даа бисти бо удаада Ажыдыышкын деп ном сонуургадып турар болганда, ону номчуулуңар: «Оът-сиген, ыяштарга база өске-даа үнүштерге хора халдатпазын оларга чугаалап каан. Ынчалза-даа хаваанда Бурганның таңмазы бастынмаан улусту шартылаа шап болур турган (Ажыд.9:4). Ооң утказы: халаптан кортпас дээр болзувусса, бистиң хаваавыска Бурганның таңмазы херек. Маргыш чок тур бе? Кым-даа маргышпайн турар. «Христосту дамчыштыр алыс шынның сөзүн – камгалалыңар дугайында Буянныг Медээни дыңнап каан болгаш, Аңаа бүзүрээн силер. Аазааны Ыдыктыг Сүлдезин силерге бергеш, Бурган силерни Бодунуң улузу кылдыр таңма-биле дег демдектеп алган. Ыдыктыг Сүлде болза Бурганның аазаан өнчүзүн салгаарывыыстың магадалы боор. Бурган биске хосталга бээрге, ол өнчүнү ээлеп алыр бис. Ол бүгү дээш, Аңаа алдар-мактал!» (Еф. 1:13-14) деп апостолдарның бижээнин езугаар алырга, Бурган Боду бисти таңмалап каан. Ынчангаш Ыдыктыг Сүлдениң ол таңмазы, бистиң камгалалывыстың бадыткалы, (дээрлерде бисти манап турар салгап алыр өнчүвүстүң бадыткал демдээ) биске чип азы штрихкод кылдыр бердинмээн. Чүге? Чүге дээрге бис Бурганның бүдүжүнүң эдилекчилери болу берген бис. Бурганның төлдери бис. Ол бисти Ыдыктыг Сүлдези-биле тыңгарып диргизип алган. Ол Ыдыктыг Сүлде бисти Христостуң Мага-Боду болур Церковунче шымындырган. Христос ол церковту аңгылап алган. «Бурганның ачы-буянынныг эге дүжүдү кылдыр Сүлдени алган бис, база Бурган бисти ажы-төлү дег, кажан-на азырап алырын; мага-бодувусту бустуушкундан кажан-на хостаарын четтикпейн манап, ишти-хөңнүвүсте човууртап чор бис». (Рим. 8:23).
Бижилге ынча дээн болганда, антихристиң тыныжының демдээ чүге биометрлиг паспорт, хавакта азы холда чип ышкаш болур деп бодаар бис? Бурганга чөшпүл болган улуска Ол Ыдыктыг Сүлдезин берип, Боду-биле чаңгыс демниг болдурарын Ыдыктыг Бижилге чугаалап турар. Шак-ла ол ышкаш, антихрист боду-биле чөшпээрешкен база аңаа бүзүрей берген улус-биле чаңгыс демниг болу бээр. Ол ындыг кижилерниң чагырыкчызы болур. Оларның бодалы (чело), оларның ажыл херектери (рука) ол таңманы бадыткап турар. А Христоска бүзүреп, Ооң удурланыкчызы - антихристке чагыртпайн, дидим туруштуг арткан кижилерни антхрист көрбестеп, истеп сүрүп, кыдыглаар болбайн канчаар. Ол чүс-чүс чылдар иштинде черле ындыг турган. Амгы бо сөөлгү үелерде ол улам көскү, билдингир апарган.
Эргим үнелиг өңнүктер, ам база бир бодал_биле үлежирин чөшпээреңер. Бир эвес Ажыдыышкын номун келир үеге хамаарыштыр бижиттинген, церковтуң көдүрүлгениниң соонда чүү болурунуң дугайында баш удур сөглээн ном деп санаар болза, (чамдык кижилер ынчаар санаар болгаш Ажыдыышкынның чүгле лаодикий церковвунга бижээнинге чедир номчуурлар), эгезинде бижиттинген Бижилгениң бо сөстерин канчаар билип алыр ужурлуг бис? «Өттүр билген бо медеглелди дыңналдыр номчуп турар кижи база ону дыңнап, ында бижээн чүвени сагып турар улус амыр-чыргалдыг. Бо сөстер чүгле сөөлгү үениң кижилеринге бижиттинген болза «сагып турар улус» деп сөстерни канчаар билир ужурлугул? Ону 2000 чылдар дургузунда сагып келген аңгы-аңгы кижилер бар-ла болгай.
Ажыдыышкын номунуң дылының утказаның дугайын катап база көрээлиңер «Удавайн болур бүгү чүүлдү Бодунуң чалчаларынга көргүссүн дээш, Бурган Иисус Христоска ажыдыышкын берген» (Ажыд. 1:1). «Көргүссүн» деп сөсче кичээнгейден салыылыңар. Арындан арынче, сценадан сценаже, чурумалдан чурумалче, болуушкундан болуушкунче Бодунуң күчү күжүн, эргезин, тиилелгезин, байырлалын Бурган көргүзүп турар. Оон ыңай бо делегейге чүү болурун, ооң чүнүң-биле төнерин Бурган көргүскен. Бурганның мөңгеде турар Церковунга «Ооң ханы-биле тиилээннер» артып каарын Иоанн көрген. Бурганга бүзүрээн улустуң кичээнгейин антихрист бодунуң өлүмүн көргүскен чурумалы-биле кижилерниң көрүжүн чардыктырып алыр дээш, эрлик бүгү күжүн салып турар. Улустуң ында-мында дыңнаан чүүлүн чедир билип албайн тарадырын, үзел-бодалдар талазы-биле чөрүлдээзин ажыглап, антихрист харын-даа чедиишкинниг болуп турар.
Кижилерни чиптер, биометрлиг паспорттар дээн чижектиг янзы-бүрү коргуушкуннарже ыдалаарынга эрлик дыка ынак. Бүдүн делегейни каржы чорук дола берген деп билир бис. Сөөлгү үеде янзы-бүрү массалыг информация чепсектерин ажыглап, четкер база бодунуң ажылын чергелештир чорудуп турарын билир бис. Ыдыктыг Бижилгеде Иисус Христостуң бисти дээш тейлеп дилээнин утпаан бис: «Мен ам бо делегейде эвес Мен. Мен Сенче чоруптум, а олар бо делегейге артып каар. Ыдыктыг Адам! Бистиң тудуш чаңгызывыс ышкаш, олар база чаңгыс эптиг болзун дээш, Меңээ бергениң Бодуңнуң адыңның күжү-биле оларны камгалап көр, … Мен оларга Сээң сөзүңнү дамчыттым, ынчангаш бо делегейниң улузу оларны көөр хүңнү чок апарган, чүге дээрге Мээң бо делегейден эвезим ышкаш, олар база бо делегейден эвес-ле болгайлар. Сээң оларны бо делегейден алгаш баарыңны дилевейн тур мен, харын оларны бузуттан камгалаарыңны дилеп тур мен. (Ин. 17:11, 14-15) Кандыг-даа паспорттардан, чиптерден корткан херээ чок. Чүден-даа корткан херээ чок! Антихристиң тыныжынга алыспайн, ооң тарадып турары меге дыңнадыгларынга удур быжыг туруштуг турарывыс чугула. (А ооң тарадып турар чүүлдери коргуушкун, аас-дыл, дүвүрел). Бисти Бодунга болгаш бот-боттарывысты Ыдыктыг Сүлдези-биле тудуштуруп турар Дээрги Бурган-Чагырыкчының күзел соруун өөрүшкү-биле анаа-ла күүседиилиңер!
Түңнелинде: Ажыдыышкын ному дараазында чүүлдерни тайылбырлап турар. Ол ажыдыышкыннар чүл дээрге, билдингир үлегер-чижек дузазы-биле бистиң амгы үеде кандыг байдалда турарывысты, база келир үевис кандыг болурун билип алгаш, сөөлгү үелер дугайында дыңнаан санывыста-ла идегелдиг тиилелге байырлалдыг өөрүшкүлүг болур ужурлуувусту ажыткан.
«Вера и жизнь» журналдың кол редактору, Вальдемар Цорн.
Раиса Кечил тыва дылче очулдурган.
