«Дээрги-Чаяакчыга чүрээңниң ханызындан идеге, а бодуңнуң угааныңга ынанма. Кандыг-даа оруктап чоруп орзуңза, Дээрги-Чаяакчыны билип аарын кызыт, Ол ынчан сээң орууңну дорттап бээр” (Уг. чугаалар 3:5-6)
Бергелерге таварышкаш, бир-ле чүвеге ынанырын бодаар бис. Чамдык улус бергелерге таварышкаш, бодунуң угаанынга, чүгле бодунга ынаныр. Бүзүрелден ойталааш, бодунуң бодап турары-биле кылыр. Бодунуу-биле кылганының түңнелинде, аштырыышкынга таваржыр. Ынчангаш Бурган: “Дээрги-Чаяакчыга чүрээңниң ханызындан идеге, а бодуңнуң угааныңга ынанма” – деп өөредип турар.
“Бодуңнуң угааныңга ынанма” - деп, чүү дээни ол? Ол дээрге: «Херектиг-даа, херекчок-даа бүгү-ле чүве бүрүзүн билирин, тодарадырын оралдашпа» дээн-дир. Дээрлерге чеде бергижевиске чедир, бистиң-биле болуп турар дыка хөй чүүлдерни билип алыр болгаш тодарадыптар арга-шинек, угаан бисте чок.
Төнчүзүнге четпээн шааңарда, Бурганның силерни эдертип чоруп орар оруктарын шиитпеңер. Доозулбаан ажыл-херекти шүгүмчүлээн херээ чок. Шыдажыңар! Кажан бир шагда, үези келирге, чүге ынчаар болуп турганынының утказын билип алыр силер. Бурган чүнү кылып турарын Боду билир. Ол кажан-даа часпас, Ол частырыглар кылбас. Силерге чүү чүве эки болурун Ол кончуг эки билир. Ооң баш бурунгаар билир чүвелерин силер баш бурунгаар көрүп шыдавас силер. Ол келир үени көрүп турар. Ол кандыг-даа болуушкуннуң түңнелин баш бурунгаар билип, көрүп турар. А силер ону билбес силер. Түрегдел, бергелер, аарышкы, аарыг-аржык дээн ышкаш хилинчээңерге хамаарыштыр: “Чүге” деп айтырыыңар бир-ле катап силерге билдинип, тодаргай апаар. Ынчангаш амдыызында ботка ынанган ажыы чок. Бир-ле хүн Бурган ажыдып, айтып бээр деп, Бурганга ынаныңар! Аңаа бүзүреңер! Силерниң Аңаа ынаныжыңар, бүзүрелиңер кезээде чайгылыш чок болур-ла болзунам!
“Дээрги-Чаяакчыны билип аарын кызыт...” хүн бүрүнүң хереглелдеринге-даа, бергелерге-даа Ону билип алырын кызыт. Авраам шак-ла ынчаар Бурганны хүндүлеп чораан (Быт 12:7; 13:18). Каяа-даа одагланып, майгынын тиккенде, Авраам кезээде Бурганны кыйгырып, Аңаа өргүлүн салып чораан. Силерниң чуртталгаңарда базым бүрүзүн Бурган удуртуп, башкарып чоруур деп, силер база Авраам ышкаш бүзүреңер. Бурганга ынаныш-биле бодуңарның бурунгаар планыңарны тургузуңар.
Хүн бүрүде амыдыралывыста кылып турар үүрмек ажылдарны Бурганның киржилгези чокка бодум кылып алыр мен деп, бодунга ынаныш – бодун бурганчытканынга дең. Ынчангаш аргажок үүрмек деп санап турарыңар ажыл-үүлеңерни безин Бурганга чугаалап, Ооң алгап-йөрээшкинин дилеңер. Амыдыралыңарга таварышкан бергелериңерни Бурганга чугаалаңар! Чоок эжиңер-биле сүмележир мурнунда, Бурган-биле сүмележиңер.
Бир эвес эртениң-не чаа үнген хүнде чүнү канчаарын билбезивисти миннип, ону канчаар эрттирерин Оон айтырып, Бурганның мурнунга сөгүрүүр болзувусса, ынчан Ооң чырыы биске чырыыр.
“Кандыг-даа оруктап чоруп орзуңза, ... Ол ынчан сээң орууңну дорттап бээр”. Бурганның айыткан оруу-биле чоруурунга белен болуңар. Хөй катап түрегделди көрген Иов үелерни дыка үнелеп чораан. “Ынчан Ооң чырыткызы мээң кырымга чырып турган, Ооң чырыы мени дүмбей өттүр эдертип аппаар турган!” (Иов 29:3). Дүбмей караңгыны силер база Иов дег, чырыктыг эрттер силер. Бурган силерни алгап-йөрээр-ле болзунам!
Аазаашкыннарыңны болгаш авыралыңны хүннүң-не мээң амыдыралымга боттандырар бодал, күзел Сенде бар деп бүзүрээр болгаш Сеңээ ынаныр мен, Бурганым! Мени бот-тогдунар чоруктан камгалап көр база Сээң чырыткың мээң кырымга чырып чоруур болзунам! Иисустуң ады-биле диледим! Ындыг-ла болзунам!
Кишинев хоорайда “Дириг Сөс”
деп хүрээ-хииттиң (церковь),
пастору Игорь Опинка.
Олча Ондар биле Римма Ондар очулдурган.
