... Дээргивис Иисус Христостуң
бистиң өг-бүлевисте чаа чаяалгазы-дыр
Кызыл хоорайның Улуг-Хем ол чарыында «Буянныг медээниң чырыы» деп, Бурганга бүзүрээннер ниитилелиниң идепкейлиг кежигүнү Чойганмаа угбай-биле чугаалаштым.
- Чойганмаа угбай, өг-бүлеңерниң тургустунган төөгүзү дыка солун боор аа?
- Ийе, уругларым ачазы Айдыс-биле школачы тургаш-ла таныжып алган бис. Айдыс шериг чоруй баарга, Кызыл хоорайга өөренип турган мен. Бир-ле катап ниити чуртталга бажыңынга өрээлимге олурумда, эжим уруг: « Сени шериг хептиг оол айтырып тур» -- дээрге үнүп келгеш көөрүмге -- Айдыс! Ынчан амгы үеде дег телефоннар бар эвес, ол мени арай боорда тып алганын чугаалай-дыр. Амыраарым аажок. Оон бээр ам чээрби ажыг чылдар шуужуп эрткен.
- Хаа, ындыг хөй бе? Ынча чылдар иштинде чурттап эрткен амыдыралыңарга ам кандыг үнелел бээр силер?
- Эгезинде бажың-балгаттыг, ажыл-агыйлыг, ажы-төлдүг эки-ле чурттап чордувус. Ынчалза-даа аравыста эп-найыралывыс чылдан- чылче кошкап, сөөлзүредир удаа-дараа арагалап, ажы-төлүвүске дыш бербейн алгыжып-кыржып, өлүржүрүнге безин белен апаргылап, чадаарда ажы-төл дээш халбактанчып, сагыш-сеткил хоозургай чурттап чораан бис.
- Берге байдалдардан үнер дээш, кандыг хемчеглер ап турган силер?
-Бо бүгүден адырлып алыксап, эки чуртталганы күзээш, база-ла шын эвес оруктан аас-кежик, өөрүшкүнү, чедимчелиг чуртталганы дилеп, лама-хамнарга, оваа дагаан черлерге барып, ламаларның сүмези-биле субурганнарны каш катап дээскинип, кижи холу-биле кылган бурганнарга чүдүп чораан бис.
- Оон кандыг түңнелдерлиг болган силер?
-Акша-хөреңгивис хилис черге чарыгдап, чашканнап, каражадап бо бүгүден эки чүнү-даа албаан бис. Харын амыдыралывыс баксыраары дам барып турган.
-Бурганны канчап билип алдыңар?
- Бир алгыш-кырыш соонда, Айдыс Бурганны хүлээп алган болган. Мен Айдысты бодуң «Иисустап» чор дээш, Бургандан ойталап шаг болган мен. Ооң соонда уругларым ачазы-биле кады Бурганга бүзүрээннер ниитилелинче барып эгелээннер. Бир катап улуг уруумнуң дилээ-биле барып көргеш, оларның өөрүшкүзүн магадааш, сонуургай берген мен. 2013 чылда өг-бүлевис-биле Иисус Христоска бачыдывыс миннип Дээргивис кылдыр хүлээп алган бис.
- Бурганны хүлээп алганыңар соонда, силерниң өг-бүлеңерге кандыг өскерлиишкиннер болганыл?
-Ол үеден эгелеп Бурганның алгаг-йөрээшкини-биле амыдыралывыста дыка хөй, эки өскерлиишкиннер болган. Арагадан, таакпыдан бүрүнү-биле адырылдывыс. Бурган өг-бүлевиске ынакшылды, өөрүшкүнү, эп-найыралды хайырлаан. Амыдыралчы, ажыл-ишчи тура-сорукту болгаш ажы-төлдүң келир үези дээш, Бурганны алдаржыдып чурттаар чаа сорулганы берген. Боттарывыстың дөрт ажы-төлүвүске немей дуңмавыстың өскүс арткан ийи уруун база азырап алган бис.
- Шынап-ла, силерниң бүзүрелиңерни ажыл-херектериңер бадыткап турар ышкажыл?
- Ол дээрге бистиң ажыл-херээвис, чедиишкиннивис эвес, а Дээргивис Иисус Христостуң бистиң өг-бүлевисте чаа чаяалгазы-дыр ийин.
- Кончуг-ла шынын сөгледиңер, аа угбай, силерниң өг-бүлеңерни Бурган алгап-йөрээгенней, алгап-йөрээп-ле турзунам! Номчукчуларывыска чүнү күзээр силер?
- Делегейде чаңгыс дириг Бурганга бүзүрээш, мөңге амыдыралды алырын, Бурганның Оглу Иисус Христосту кижи бүрүзү алдаржыдарын күзээр-дир мен.
- Ындыг-ла болзунам!
Олча ОНДАР.
